Deutsch / Albanisches Wirtschaftsportal

Tatimi mbi ndërmarrjet dhe personat

Të gjithë shtetasit me banim në Shqipëri i nënshtrohen tatimit mbi të ardhurat për të ardhurat e realizuara në shkallë botërore. Shtetasit që nuk banojnë në Shqipëri i nënshtrohen tatimit për të ardhurat e realizuara në Shqipëri.

Tatimi mbi të ardhurat nuk zbatohet mbi të ardhurat mujore prej 14.000 Lekë të një punëmarrësi. Jashtë kësaj shume të patatueshme, ky tatim paguhet në shumë shkallë, secila me një tarifë të përcaktuar dhe me një përqindje fikse deri në një limit të caktuar për të ardhurat që tejkalojnë kufirin e të ardhurave mujore. Kjo tarifë vjen duke u rritur nëpërmjet disa shkallëve nga 5 deri në 25 për qind.

Dividentët, të ardhurat nga interesat dhe nga ortakëritë sipërmarrëse dhe të ardhurat e kthyera tatohen në masën 10 për qind.

Gjatë shitblerjes së pasurive të patundshme, si psh troje dhe toka, paguhet një tarifë tatimore progresive, nga 0,5 në 3 për qind (duke filluar nga një vleftë shitjeje prej 6 milion lekë).

Tatimi i shoqërive aksionere(tatimi mbi fitimin e ndërmarrjes)

Tatimit mbi fitimin e ndërmarrjes i nënshtrohen të gjithë personat juridikë dhe persona të tjerë të cilët kryejnë veprimtari ekonomike në Shqipëri si dhe gjithë personat e tjerë, që i nënshtrohen tatimit mbi vlerën e shtuar, pavarësisht nga forma e tyre ligjore.

Shoqëritë aksionere me seli në Shqipëri e paguajnë këtë tatim për të ardhurat e tyre me burim në shkallë botërore, ndërsa shoqëritë të cilat nuk e kanë selinë e tyre në Shqipëri paguajnë tatimin mbi fitimin e ndërmarrjes për të ardhurat e tyre me burim në Shqipëri. Shkalla e këtij tatimi është 25 për qind e fitimit vjetor neto.

Të ardhura të tilla si dividentë, pjesë fitimi, interesa, taksa mbi licencat dhe honoraret i nënshtrohen një tatimi bazë prej 15 për qind kur ato paguhen nga tatimpaguesi jo me seli në Shqipëri dhe 10 për qind kur ato paguhen nga shoqëri me seli në Shqipëri. Dividentët, që një ndërmarrje me seli në Shqipëri i paguan një ndërmarrjeje tjetër me seli po aty, nuk i nënshtrohen këtij tatimi, kur pjesëmarrja me aksione është të paktën 25 për qind.

Fitimi tatimor rezulton nga diferenca ndërmjet të ardhurave dhe shpenzimeve të zbritshme. Baza e kësaj llogaritjeje është fitimi i bilancit i korrigjuar dhe shpenzimet e zbritshme dhe të pazbritshme. Humbjet mund të barten për një periudhë tre vjeçare.

Shpenzime të zbritshme janë ndër të tjera shpenzimet e amortizimit, qeramarrjes dhe rentat e tokës, lëndët e para e ndihmëse, primet e sigurimit për pasuritë e patundshme, automjetet dhe mallrat. Humbjet mund të barten për një periudhë tre vjeçare.

Shpenzime të pazbritshme janë ndër të tjera shpezimet e blerjes dhe shfrytëzimit të tokës dhe trojeve, shpenzimet e blerjes dhe rivënies në qarkullim të artikujve të përdorur, pagesat për skemën vullnetare të pensioneve, dividentët, pagesat e interesave të cilat i kapërcejnë përqindjet e interesave dhe raportin aktive/pasive 4:1të përcaktuar nga Banka Qëndrore e Shqipërisë, shpenzimet e përfaqësimit, shpenzimet për dhurata e reklamë, të gjitha shpenzimet e padokumentuara të taksapaguesve dhe shpenzimet e tyre private.

Shkalla e amortizimit të mallrave do të llogaritet mbi bazën e një sistemi “pooling”. Godinat dhe makineritë me afate të gjata shërbimi në këto godina amortizohen në mënyrë lineare për një periudhë mbi 20 vjet, ndërsa kompjuterat e programet kompjuterike dhe artikuj të tjerë për një periudhë mbi 5 vjet.

Tatimi i biznesit të vogël

E drejta tatimore shqiptare i mundëson biznesit të vogël pagimin e një tatimi të thjeshtësuar. Kusht për këtë është që personi që kryen këtë veprimtari ekonomike të mos jetë i detyruar të paguajë tatimin mbi qarkullimin. Kjo ndodh kur qarkullimi vjetor i mallrave është nën 8 milion lekë. Tatimi mbi ndërmarrjet të cilat rregjistrohen si biznese të vogla, përbëhet nga dy komponentë:

I pari përfaqëson pjesën lokale të tatimit të ndërmarrjeve të vogla: caktohet një shumë fikse tatimi në vartësi të veprimtarisë ekonomike dhe vendit ku ushtrohet kjo veprimtari. Komunat kanë të drejtë të bëjnë një shtesë ose një zbritje në masën 30 për qind. Kur tatimpaguesi e kryen menjëherë pagesën e tatimit, ai përfiton një ulje prej 10 për qind.
Komponenti i dytë ka të bëjë me tatimin e ndërmarrjeve të vogla në formën një tatimi të përgjithshëm me një tarifë ekuivalente me fitimin në nivel lokal. Ky tatim është i barabartë me 4 për qind të qarkullimit për vlefta qarkullimi të cilaat luhaten ndërmjet 2 – 4 milion Lekë. Për bizneset, qarkullimi vjetor i të cilëve nuk e kalon shumën 2 milion lekë, caktohet një shumë vjetore fikse tatimi që luhatet ndërmjet 15.000 – 100.000 Lekë.